Boksieri i njohur me origjinë shqiptare, Florian Marku, është arrestuar nga policia gjermane për llogari të autoriteteve greke. 32-vjeçari u ndalua për një incident të ndodhur vite më parë në Greqi, ku ai kishte kryer një pjesë të dënimit, por me ligjin e ri, do të duhet të shlyejë edhe 6 muaj të tjerë.
Marku ishte përfshirë në një konflikt në Greqi dhe ndaj tij rëndonin dy akuza. Ai kishte shërbyer 1.6 vite burg nga një dënim prej 7 vitesh, dhe sipas ligjit të ri, duhet të rikthehet për të kryer pjesën e mbetur të dënimit, së paku 1/3 e tij. Arrestimi u bë në Gjermani, ku Marku kishte shkuar për arsye personale dhe u ndalua më 9 dhjetor.
Përveç karrierës së tij si boksier, me ndeshje në shtete të ndryshme, Florian Marku ka bazën e tij në Angli, ku jeton me familjen dhe ka ndërtuar një karrierë të suksesshme. Megjithatë, tani do të duhet të përballet me çështjen ligjore në Greqi për të zgjidhur këtë problem.
