Emisioni investigativ Fiks Fare trajtoi për disa ditë rastin e vrasjes së 15-vjeçarit Fatjon Bici, ngjarje që ndodhi në maj të vitit 2023 në qytetin e Gramshit.
Familjarët e viktimës, përfshirë prindërit e tij, iu drejtuan emisionit për ndihmë, pasi dy nga autorët e dyshuar të krimit ishin liruar nga burgu.
Kjo ndodhi pa asnjë shpjegim për familjen, e cila vazhdon të kërkojë drejtësi për humbjen e djalit të tyre.
Emisioni Fiks Fare u interesua pranë Policisë së Gramshit dhe mësoi se lirimi i dy autorëve të dyshuar ishte urdhëruar nga gjykata, duke përcaktuar për ta masën e arrestit shtëpiak.
Gjithashtu, disa ditë më parë, emisioni kontaktoi me Gjykatën e Apelit në Tiranë, ku u sqarua se vendimi për lirimin ishte marrë për shkak të zvarritjeve të procesit hetimor dhe gjyqësor nga Prokuroria dhe Gjykata e Elbasanit.
Autorët kishin kaluar më shumë se 18 muaj në paraburgim, dhe sipas ligjit, nuk mund të mbaheshin më gjatë në qeli pa një vendim përfundimtar.
Megjithatë, sot, më 12 dhjetor 2024, gjatë seancës së radhës, pas ndërhyrjes së Fiks Fare, Apeli vendosi rikthimin e tyre në qeli, duke lënë në fuqi vendimin e mëparshëm të Gjykatës së Elbasanit.
Dy nga autorët e dyshuar të ngjarjes, mes të cilëve edhe Ergi Karaj, i cili ishte dënuar me 27 vite burg, por përfitoi ulje dënimi në 18 vite pas një gjykimi të shkurtuar është lënë në arrest shtëpiak.
Familjarët e viktimës mësuan për këtë vendim përmes banorëve të Gramshit, ndërsa më pas e konfirmuan nga shefi i komisariatit, i cili u informoi se Karaj ndodhej në shtëpi nën masën e arrestit shtëpiak.
Duke ndjerë se drejtësia nuk është vendosur, familja e të ndjerit kërkon burgosjen e autorëve pa përfitime nga gjykimi i shkurtuar dhe zbatimin e një procesi të drejtë dhe të plotë penal.
“Nuk ka shtet, ata duhet të jenë në burg, “djali im është në dhe’, kush do mendojë për atë. Po luajnë me gjakun e djalit tim” thotë mës lotësh nëna e viktimës Afërdita Bici.
Pas ankesës, familjarët e viktimës shkojnë në Komisariatin e Policisë në Gramsh, ku kërkojnë të takojnë Shefin e Komisariatit, por nuk është dhe bisedojnë me punonjës të tjerë.
Punonjësi i policisë u thotë familjarëve se “këtu s’ka drejtësi, s’ka gjykatë dhe askujt mos t’i bjerë”. Ai shton se autorët e çuan në Apel dhe krijuan atje një boshllëk dhe tani janë në arrest shtëpie.
“Ne na krijojnë probleme që të ruajmë kriminelin dhe të rrinë në qeli. Edhe ne jemi prindër dhe themi ça bëhet kështu. Ai duhet të jetë me burgim të përjetshëm” u thotë polici familjarëve.
Fiks Fare ka siguruar dosjen hetimore dhe gjyqësore të vrasjes së 15 vjeçarit. Në dosje autorët flasin në aplikacionet “Tik Tok” dhe “Snap Chat” se “do të bëjmë terror”.
Madje, ata blejnë në internet thika dhe doreza në qytetin e Gramshit, pavarësisht se janë të mitur.
Ata kanë dëshmuar se e kanë qëlluar disa herë, objektivi ishte personi tjetër po viktima u doli përpara. Tregojnë se janë zënë në rrjete sociale me njëri-tjetrin janë sharë dhe ofenduar
“E goditën Ergin në fytyrë dhe atëherë Ergi kishte në dorën e djathtë thikën me buton e goditi në kurriz me thikë. Kur na kapi policia, Ergi e hodhi thikën e gjakosur” ka dëshmuar njëri prej tyre.
Në dosje jepen detaje nga këqyrja e telefonëve të autorëve, ku në telefonin e Orgitos janë 7 foto ku përmenden blerje dorezash. Në “Tik Tok” vërehen biseda me përdoruesin Rudolf ku përmendet nga Orgito “nesër do shohësh terror, shihe. Nesër do e shohësh”.
Madje në biseda në “Tik Tok” jepen detaje se çfarë do të bëjnë, madje të autorit Ergi Karaj me doreza të boksit, biseda me Orgito që pranon se ka thikë dhe komenton se “thikën në fyt”, “thikën në bark”.
