Kreu i SPAK-ut, Altin Dumani, është shpallur kampion global i luftës kundër korrupsionit nga Departamenti Amerikan i Shtetit.
Ky vlerësim u dha mbrëmjen e sotme nga Sekretari amerikan i Shtetit, Antony Blinken, i cili theksoi se Dumani ka udhëhequr një agjenci të re dhe ka goditur politikanët e lartë dhe grupet e strukturuara kriminale.
“Altin Dumani drejtoi një agjensi të re. Ka goditur politikanët e lartë dhe grupet e strukturuara kriminale”, tha Blinken.
Blinken vlerësoi gjithashtu se Dumani ka kontribuar në forcimin e besueshmërisë së SPAK-ut, duke e bërë atë një institucion më të besueshëm në Shqipëri.
Ky vlerësim vjen pas një takimi që Dumani pati me zyrtaren e lartë amerikane, Colleen Hyland, e cila shprehu mbështetje të plotë për SPAK-un dhe drejtuesin e tij.
Altin Dumani ka një karrierë të gjatë në sistemin e drejtësisë, duke nisur punën si prokuror në Sarandë në vitin 1999, dhe më pas duke u emëruar drejtues prokurorie për herë të parë në Tropojë në vitin 2000.
Ai është i njohur për qëndrimin e tij të fortë gjatë gjykimit të tragjedisë së Gërdecit, ku kërkoi dënime të përjetshme për tre nga të pandehurit kryesorë.
Një nga arritjet e Dumanit është drejtimi i njësisë Task Forcë, e cila u krijua për të luftuar krimin e jakave të bardha. Aktualisht, ai është kreu i komanduar i Prokurorisë së Apelit për Krimet e Rënda.
Dumani ka udhëhequr operacione të rëndësishme, si ai që çoi në arrestimin e 13 personave, përfshirë gjyqtaren e Gjykatës së Krujës, Enkelejda Hoxha, e cila ishte akuzuar për lirimin e të dënuarve të fortë.
Gjithashtu ka qenë i përfshirë në hetimin e operacionit të koduar “Golden Bullet”, i cili çoi në arrestimin e dy vrasësve me pagesë, Nuredin Dumani dhe Henrik Hoxha, të cilët u bënë të penduar të drejtësisë.
Dumani theksoi se gjatë 23 viteve të karrierës ka arritur të krijojë një bazë solide pune, por nuk ka hezituar të kritikojë veten dhe punën e kolegëve të tij, duke theksuar angazhimin e tij për të përmirësuar gjithmonë punën e institucioneve të drejtësisë.
