Mjeku Dritan Todhe, i cili kuroi autorin e vrasjes së 14-vjeçarit, ka reaguar pas akuzave se ka refuzuar t’i japë Drejtorisë së Burgjeve epikrizen dhe fletën e daljes nga spitali.
Ai ka përgënjeshtruar lajmet që qarkulluan, duke sqaruar se informacioni është i rremë dhe se ai ka ndjekur të gjitha procedurat e nevojshme.
Në një prononcim për Euronews, Todhe theksoi se ishte ngarkuar padrejtësisht nga Drejtoria e Burgjeve si “mjek që kundërshton shtetin shqiptar”, një akuzë që ai e konsideron të pabazuar.
Ai sqaroi se kishte pasur një bashkëpunim të shkëlqyer me Policinë e Tiranës dhe me Sigurinë e Tiranës, të cilët, pavarësisht pushimit të premtes, ndihmuan në procesin e trajtimit.
Gjithashtu, Todhe ka pohuar se dje natën morën informacion që Drejtoria e Policisë kishte vendosur që vendimi për lirimin e të arrestuarit të merrej brenda një gjysmë ore, një vendim i cili ishte marrë nga gjykata dhe që, sipas tij, është pa sens të bllokohej nga ndonjë veprim tjetër.
