Pas arrestimit të 19-vjeçarit për plagosjen e një 20-vjeçari në Qytetin Studenti, policia ka marrë nën hetim një 52-vjeçar, i cili dyshohet se i ka shitur thikën autorit të ngjarjes.
Sipas informacionit të policisë, autori, 19-vjeçari A. A., e goditi me thikë 20-vjeçarin Aron Demiraj, i cili ndodhet në gjendje të rëndë në spitalin e Traumës, me plagë në mushkëri, kraharor dhe qafë.
I dyshuari, A. A., është arrestuar, ndërsa shtetasi E. T., 52 vjeç, i cili i ka shitur thikën, është proceduar në gjendje të lirë.
Ngjarja ndodhi pasi një konflikt i nisur brenda Universitetit Metropolitan për një mosmarrëveshje për “shkeljen” dhe një shtyrje mes dy të rinjve, përfundoi me përdorimin e mjetit prerës.
Policia tha se po heton lidhjen e plotë mes dy të rinjve dhe shkakët e ngjarjes.
