Gjykata e Sarandës ka vendosur masën e “arrest me burg” për 25-vjeçarin Fabian K., i cili dyshohet të jetë anëtari i tretë i grupit që dy muaj më parë trafikoi 10 pistoleta të tipit “Glock”.
Prokurorja Hava Memko ka lëshuar urdhër-arrestin, ndërsa Gjykata ka caktuar masën e sigurisë “Arrest në burg” në mungesë për 25-vjeçarin nga Këlcyra.
Fabian K. u arrestua nga policia e Përmetit dhe u përball me Gjykatën e Sarandës, e cila ka konfirmuar masën e sigurisë.
Pas marrjes në pyetje, gjyqtari Mikel Hysometaj ka vendosur që të vazhdojë zbatimi i masës “arrest me burg”, duke theksuar se nuk ka asnjë rrethanë të re që nuk ishte marrë parasysh nga Gjykata gjatë caktimit të masës në mungesë.
Fabian K. nuk ka pranuar të japë shpjegime gjatë seancës për vlerësimin e masës së sigurisë.
Më 13 shtator, policia e Sarandës ndaloi një automjet tip “Nissan” me targa AA827SV, në aksin Kardhiq-Delvinë, dhe gjatë kontrollit gjeti dhe sekuestroi një qese plastike që përmbante 10 pistoleta tip “Glock”. Po ashtu, në brendësi të qeses u gjetën dhe tre kuti kartoni me qese plastike të tejdukshme, me mbishkrimin “Hondgun 38050 centerfire pistol cartridges”, që përmbanin 150 fishekë me kapsollë të pa goditur, me markirovka të njëjta PPU 380 AUTO. Përveç armëve dhe fishekëve, në automjet u sekuestruan edhe 250 euro.
Policia arrestoi dy shtetas, Klaudio Osmani, 23 vjeç, punonjës në zjarrfikësen e Këlcyrës, dhe Mehmet Canaj, 24 vjeç, të dy banues në Këlcyrë. Pas arrestimit, forcat e rendit deklaruan se destinacioni i pistoletave ishte Saranda, por nuk dhanë detaje nëse ato do të shiteshin në qytet ose do të trafikoheshin drejt Greqisë.
