Presidenti i Partisë së Lirisë, Ilir Meta, nga burgu 313 ku po qëndron në izolim ka deklaruar se përfaqësues të SPAK i kanë sugjeruar prej një viti të arratisej.
Meta pretendon se ky sugjerim kishte për qëllim ta largonte nga aktiviteti opozitar, dhe se refuzimi i tij për të ikur çoi në arrestimin dhe izolimin e tij të papritur.
“Po është shumë e vërtetë që njerëz të regjimit dhe SPAK-ut prej një viti më kanë sugjeruar, jo për të më ndihmuar mua, por për të më shmangur nga aksioni opozitar dhe patriotik. Kjo provohet me faktin që pas refuzimeve të mia edhe publike, ata aktivizuan një proces fals për të më rrëmbyer dhe izoluar nga opozitarizmi siç e shpjegova më lart”, tha ai.
Meta theksoi se nuk është ngritur asnjë akuzë zyrtare ndaj tij dhe se të gjitha pretendimet kundër tij bazohen vetëm në spekulime të personave të inkriminuar dhe me probleme me drejtësinë.
“Po jua përsëris që nuk kanë asnjë akuzë, asnjë prove apo fakt penal kundër meje, prezumohem i pafajshëm dhe në këto kushte dënimi ekziston vetëm në mendjet perverse të atyre që e ideuan dhe ekzekutuan këtë plan rrëmbimi politik për të përjetësuar Shqipërinë si koloni të Sorosit dhe mafias ndërkombëtare”, u shpreh Meta.
