Arlind Qori, i ftuar në emisionin Open në News 24, shprehu shqetësimin për nivelin e ulët të pensioneve në Shqipëri, duke e quajtur pensionin mesatar të barasvlershëm me minimumin jetik. Ai theksoi se shumë të moshuar nuk arrijnë të sigurojnë mjaftueshëm ushqim.
Qori kritikoi qeverinë, duke thënë se qindra milionë që vidhen mund të shfrytëzoheshin për subvencionimin e skemës së pensioneve.
Duke iu referuar projektbuxhetit për vitin 2025, Qori vuri në dukje se raporti kontribues-pensionist do të mbetet në nivelin aktual prej 1.17, çka sipas tij tregon mungesën e përpjekjeve të qeverisë për të luftuar informalitetin dhe përmirësuar skemën e pensioneve.
Ai akuzoi qeverinë për shpërfillje ndaj pensionistëve, duke kritikuar qëndrimin e Kryeministrit Edi Rama, i cili flet herë për bonuse dhe herë për rritje të pensioneve, por pa përmirësuar realisht situatën.
