Në portin e Durrësit është arrestuar nga policia një 32 vjeçar, pasi po tentonte të fuste në Shqipëri një shumë parash, 31 120 paundë të futura në shasinë e furgonit pa i deklaruar. Burimi i parave është i dyshimtë, teksa 32 vjeçar, Alidin Kola, banues në Tiranë u vu në pranga.
Gjatë kontrollit në furgon nga policia u gjetën veshje, vegla pune dhe pajisje elektroshtëpiake, dyshohet se janë të kontrabanduara pasi nuk kishin fatura blerjeje. Furgoni, paratë me gjithë sendet e gjetura brenda u sekuestruan. Mësohet se furgoni ka ardhur përmes linjës Bari-Durrës.
Materialet proceduriale i janë kaluar Prokurorisë së Durrësit, për veprat penale “Përvetësimi i parave ose mallrave që rrjedhin nga vepra penale ose veprimtaria kriminale”, “Mosdeklarimi në kufi i të hollave dhe i sendeve me vlerë” dhe “Kontrabanda me mallra të tjera”.
Njoftimi zyrtar:
Si rezultat i kontrolleve të imtësishme në hyrje/dalje të Shqipërisë, me qëllim garantimin e qarkullimit të ligjshëm dhe të sigurtë të shtetasve dhe mallrave, Seksioni i Hetimit dhe ZMPKT Durrës, në bashkëpunim me Stacionin e Policisë Kufitare të portit të Durrësit, finalizuan operacionin policor të koduar “Checked”, gjatë të cilit u arrestua në flagrancë shtetasi A. K., 32 vjeç, banues në Tiranë.
Në bazë të informacioneve të siguruara në rrugë operative, është kaluar në vijë të dytë, për kontroll më të detajuar, furgoni që drejtonte 32-vjeçari. Nga kontrollet, në këtë automjet janë gjetur të fshehura në shtresën e shasisë, nën sediljen e drejtuesit, 31 120 paunde. Gjithashtu, në furgon janë gjetur veshje, vegla pune dhe pajisje elektroshtëpiake. Paratë, të cilat kanë burim të dyshimtë, shtetasi A. K. synonte t’i fuste në Shqipëri, pa i deklaruar, ndërsa mallrat dyshohet se janë të kontrabanduara, sepse nuk ishin të shoqëruara me fatura blerjeje.’, njofton policia.
