Pas barazimit në derbi ndaj Dinamos, një javë më parë, Partizani është ndalur sërish në një barazim, në sfidën e vlefshme për javën e pestë të ‘Abissnet Superiore’. Të kuqtë për ndeshjen e dytë radhazi nuk shkojnë më shumë se një barazim, teksa kanë lënë pikë në fushën e Laçit, që mban vendin e fundit në renditjen e Superiores. Në një ndeshje shumë të luftuar, por me pak emocione, gjithçka ka ndodhur në fundin e takimit. Zeka i dha avantazhin të kuqve në minutën e 80-të, pas një sulmi nga e djathta, por pak minuta më vonë, konkretisht në të 85’, ata u arritën nga Ballhysa, i cili shënoi golin e barazimt për kurbinasit. Kështu, Partizani mori vetëm një pikë dhe nuk ia doli që të mbante kreun në një javë të rëndësishme siç është ajo e derbit me Tiranën. Nga ana tjetër, Laçi bëri një lojë të mirë, por nuk ia doli përsëri të gjente fitoren e parë të këtij kampionati ku për momentin gjendet në vendin e fundit.
