Kategoria Superiore zhvilloi dy ndeshje të tjera për raundin e katërt të sezonit të ri futbollistik. Në Korçë, Teuta siguroi fitoren e dytë në këtë edicion, duke mposhtur Skënderbeun me përmbysje. Në një ndeshje shumë emocionuese, me raste të njëpasnjëshme në të dy portat, ishte skuadra korçare ajo që kaloi e para në avantazh në minutën e 8’ me Nikaj, por gjeti përgjigjen e shpejtë të durrsakëve të cilët goditën traversën, ndërsa më pas barazuan me Beqjen në të 37’, duke bërë që pjesa e parë të mbyllej në barazim.
I njëjti ritëm i lartë vazhdoi edhe në pjesën e dytë, por durrsakët u treguan më konkretë para portës, teksa shënuan fillimisht me Preknicajn e më pas me Krujën në të 66’ dhe 73’, për të përmbysur shifrat e siguruar një rezultat 3-1 që u munduan ta ruanin deri në fund të duelit. Goli i Rashicës në 94’ i dha pak shpresë korçarëve, por erdhi shumë vonë për të ndryshuar fatin e këtij takimi. Korçarët kërkuan një penallti në shtesë, por nuk ishte i të njëjtit mendim gjyqtari Hamiti i cili e mbylli ndeshjen mes kontestimeve. Me këtë fitore, Teuta ngjitet në kuotën e 6 pikëve, ndërsa Skënderbeu mbetet në 4 pikë.
Në takimin tjetër, të zhvilluar në Shkodër, Vllaznia i shkakton humbjen e parë në këtë sezon kampionëve të Egnatias. Skuadra e Brdariç triumfoi me rezultatin 3-1. Mala hapi serinë e golave në minutën e 16-të, ndërkohë që rrogozhinasit u kundërpërgjigjën me Ujkën në minutën e 28-të. Teksa po shkonte minuta e 40-të, ishte Klinti Qato që rrëmbeu skenën me një supergol të shënuar nga distanca. Pjesa e parë u mbyll me shifrat 2-1. Për golin që do të vuloste shifrat në 3-1 mendoi kapiteni Bekim Balaj në minutën e 49-të. Falë këtij triumfi Vllaznia është ngjitur në kuotën e 7 pikëve, po aq sa Egnatia. Në sfidën e radhës shkodranët do të përballen në transfertë me Teutën, ndërsa Egnatia do të presë Bylisin.
