Kombëtarja shqiptare e futbollit përballet mbrëmjen e sotme në 20:45 me Gjeorgjinë, në sfidën e vlefshme për grupin B1 të Nations League. Kuqezinjtë do përballen në ‘Air Albania’ me një kundërshtar aspak të lehtë, pasi gjeorgjianët po kalojnë një formë fantastike. Përvec se u cilësuan si surpriza e Europianit të fundit në Gjermani, të besuarit e trajnerit Sagnol, morën një fitore të madhe ndaj Rep. Çeke tre ditë më parë në shtëpi 4-1.
Kë favorizojnë bastet?
Për sfidën e sotme, kompanitë e basteve kanë caktuar koeficientët ku fitorja e kuqezinjve të Sylvinhos vlerësohet me 2.40, ndërsa barazimi kuotohet me 3.10. Një triumf i mundshëm i gjeorgjianëve ka koeficientin 3.00. Shqipëria duket disi më e favorizuar nga koefiçentët e basteve, por duhet theksuar se ndaj Gjeorgjisë statistikat nuk janë në favorin tonë.
Statistikat e përballjeve direkte
Shqipëria është përballur në 15 takime me Gjeorgjinë, duke fituar vetëm 3 herë. 8 takime të tjerë kanë shkuar në favor të Gjeorgjisë ndërsa 4 takime kanë përfunduar në barazim. Gjithsesi kuqezinjtë janë më të favorizuar në sfidat e zhvilluara në vendin tonë, pasi të treja fitoret janë koleksionuar në përballjet e luajtura në Tiranë. Edhe bilanci i golave flet në favor të kundërshtarëve të sotëm. Në portën kuqezi janë realizuar 23 gola, kundrejt 13 të Shqipërisë. Pas xhiros së pare të ndeshjeve të Nations League, të dy ekipet kryesojnë me pikë të plota në grupin B1, për këtë arsye kjo shihet si një ndeshje mes dy ekipeve favorite për të fituar këtë grup. Kujtojmë se sfida e sotme luhet nën një atmosferë të zjarrtë, pasi janë shitur të gjitha biletat dhe më shumë se 21 mijë tifozë kuqezi do jenë në stadiumin ‘Air Albania’.
Edhe pse përballjet direkte flasin në favor të kundërshtarëve, Shqipëria do të kërkojë të mbështetet te statistikat e trajnerit Sylvinho, i cili nuk ka asnjë humbje në ndeshjet e luajtura në “Air Albania” nën drejtimin e kuqezinjëve. Kombëtarja duhet të ruajë të paprekur fortesën, teksa në fushë lojtarët do të kërkojnë vetëm fitoren, për të konfirmuar edhe formën e mirë që ka treguar gjatë gjithë këtij viti.
Formacioni i mundshëm
Për sfidën e sotme, trajneri Sylvinho pritet të hedhë në fushë të njëjtën skemë dhe të njëjtët emra si në ndeshjen e fituar tre ditë më parë kundër Ukrainës në Pragë. Dilemë e vetme në krahun e djathtë të mbrojtjes, ku në balotazh është Hysaj dhe Balliu, me këtë të fundit që duket disi në avantazh.
Shqipëria (4-3-3): Strakosha; Balliu,( Hysaj), Ismajli, Kumbulla, Mitaj; Asllani, Ramadani, Laçi; Asani, Bajrami, Manaj Trajner: Sylvinho
