Në një konferencë për mediat, kreu i Policisë së Tiranës, Tonin Vocaj, njoftoi një sërë rastesh të krimeve kibernetike, ku në fokus ishin shantazhimi i vajzave të mitura përmes publikimit të imazheve apo videove intime në profile të krijuara në rrjete sociale. Përveç kësaj, Vocaj ndaloi edhe te dy raste të rëndësishme të vjedhjes së parave nga ATM-të përmes përdorimit të kartave të klonuara.
Një nga rastet kryesore lidhet me operacionin e koduar “Goldish Axe”, gjatë të cilit u dokumentua veprimtaria kriminale e tre rumunë, të cilët arritën të vjedhin para nga ATM-të në Tiranë me anë të kartave të klonuara. Vocaj bëri të ditur se gjatë hetimeve, policia arriti të dokumentojë ligjërisht katër vjedhje të kësaj natyre dhe dy tentativa të tjera që mbetën të pasuksesshme.
Për të realizuar kapjen e rumunëve të përfshirë në këtë veprimtari kriminale, policia shqiptare po bashkëpunon ngushtë me Interpolin.
Deklarata e Tonin Vocaj:
“Finalizimi i operacionit policor të koduar “Goldish Axe”, gjatë të cilit u dokumentua ligjërisht veprimtaria kriminale e 3 shtetasve rumunë, të cilët me anë të prodhimit të kartave të kreditit të klonuara, kartave të kreditit të vjedhura dhe duke dëmtuar bankomatë të ndryshëm, për të ndërhyrë më pas në sistemet e tyre kompjuterike, kanë vjedhur shuma të ndryshme monetare, në institucione të ndryshme financiare që operojnë në qytetin e Tiranës. Gjatë hetimeve të këtij operacioni policor, janë zbardhur dhe dokumentuar me prova ligjore 4 vjedhje të kësaj natyre dhe 2 të tjera të mbetura në tentativë. Vijon puna në bashkëpunim më Prokurorinë pranë Gjykatës së Shkallës së Parë të Juridiksionit të Përgjithshëm Tiranë dhe Zyrën e INTERPOL TIRANA, për kapjen e këtyre shtetasve.”
