Laert Haxhiu, një nga personazhet më të kërkuar të Policisë së Shtetit është ekstraduar sot nga Greqia. Për lëvizjen e tij nëpër Shqipëri, 3 furgona të Policisë së Shtetit kanë shkuar në Kakavijë për të pritur dhe për të sjellë në Tiranë.
Lidhur me ekstradimin e tij ka reaguar përmes një komunikate për mediat edhe Policia e Shtetit, e cila bën me dije se Laert Haxhiu është sjellë në pikën doganore të Kakavijës në masa të larta sigurie nga policia greke dhe më pas aty është marrë në dorëzim nga forcat speciale “RENEA”.
“Ekstradimi i 32-vjeçarit është kryer pas bashkëpunimit mes Interpol Tiranës dhe Interpol Athinës.“Ky shtetas ishte shpallur në kërkim ndërkombëtar nga Interpol Tirana, pasi:
-Gjykata e Lushnjës, në vitin 2017, e ka dënuar me 18 vjet burgim, për veprat penale “Vrasja në rrethana të tjera cilësuese”, mbetur ne tentativë dhe “Mbajtja pa leje dhe prodhimi i armëve, armëve shpërthyese dhe i municionit”. Shtetasi Laert Haxhiu, më datë 25.09.2016, ka plagosur me armë zjarri shtetasit Xh. Sh. dhe S. Xh.;
-Gjykata e Posaçme kundër Korrupsionit dhe Krimit të Organizuar, në vitin 2020, e ka denuar me burgim të perjetshëm, per veprat penale “Grupi i strukturuar kriminal”, “Kryerja e veprave penale nga organizata kriminale ose grupi i strukturuar kriminal”, “Vrasja në rrethana të tjera cilësuese”, “Mbajtja pa leje dhe prodhimi i armëve, armëve shpërthyese dhe i municionit” dhe “Prishja e qetësisë publike”.” – thuhet ndër të tjera në njoftimin e Policisë.
Dosja u zbërthye pas dëshmisë së të penduarit të drejtësisë, Marjus Tafani. Laert Haxhiu u arrestua në Selanik të Greqisë dhe është në pritje të vendimit të gjykatës greke, nëse do të ekstradohet në Shqipëri. Lidhur me akuzat e ngritura ndaj tij, në prill, Gjykata e Posaçme kundër Korrupsionit dhe Krimit të Organizuar e dënoi me burg përjetë. Dënim që gjithashtu e kanë marrë edhe miqtë e tij më të ngushtë, edhe bashkëpunëtorët në krimet e kryera, Orgest Bilbili dhe Anterio Kaloshi.
