Kryeministri Edi Rama ka dorëzuar sot 200 tituj të pronësisë për banesat në Theth dhe disa zona të tjera të veriut të Shqipërisë, duke ndihmuar shumë familje të sigurojnë të drejtat mbi pronat e tyre. Gjatë një ceremonie të mbajtur në Theth, Rama bëri të ditur se pjesa tjetër e titujve do të shpërndahet gjatë ditës.
Gjithashtu, kryeministri theksoi se ekzistojnë edhe 90 tituj të tjerë të pronësisë që kërkojnë ndërhyrje shtesë. “Për një pjesë të tyre, bashkia e Shkodrës do të duhet të bëjë një ndryshim në studimin e zonës,” tha Rama. Ai shtoi se për 50 tituj të tjerë ka probleme ligjore për shkak të ndërtimeve që janë realizuar në pronat e tyre përtej afatit të lejuar në ligjin për legalizimet. “Do të gjejmë një zgjidhje të dedikuar për të gjitha ata, të cilët janë në kushtet tuaja, ku pamundësia e marrjes së një leje ka qenë objektive,” premtoi Rama.
Në të njëjtën linjë, Rama trajtoi edhe çështjen e gjobave që janë vendosur për disa ndërtime jo të ligjshme. Ai shpjegoi se këto ndërtime janë realizuar jo për t’iu shmangur ligjit, por për shkak të nevojës për të krijuar ekonomi përmes turizmit në një zonë të mbrojtur natyrore, ku legjislacioni i ri ka krijuar vështirësi shtesë. Si rezultat, qeveria ka vendosur të falë të gjitha këto gjoba. “E kemi diskutuar dhe siç e thashë, nuk janë tipikisht ndërtime të bëra abuzivisht për t’iu shmangur ligjit,” përfundoi Rama.
