Gjykata Kushtetuese ngrihet në lartësinë e duhur dhe vendosi sot të pranojë pjesërisht kërkesën e Partisë Demokratike dhe të shfuqizojë nenin 69, pika “dh”, të ligjit “Për tatimin mbi të ardhurat”. Ky vendim rrëzon tatimin prej 15 deri në 23 për qind që qeveria kishte vendosur për profesionet e lira.
Kryetarja e Gjykatës Kushtetuese, Olta Zaçaj, theksoi se vendimi u mor për shkak të mosrespektimit të parimit të sigurisë juridike dhe parimit të proporcionalitetit. Sipas saj, detyrimi tatimor prej 15% për profesionet e lira ishte një masë joproporcionale dhe e papërshtatshme, pasi nuk u la kohë e mjaftueshme për përshtatje me skemën e re tatimore.
Gjykata argumentoi se neni 69 dhe neni 4 i VKM 753/2023, që përcaktonin tatimin e profesioneve të lira, cenonin lirinë e veprimtarisë ekonomike dhe nuk respektonin pritshmëritë ligjore të këtyre profesionistëve. Vendimi u mor pas shqyrtimit të padisë së depozituar nga 37 deputetë të Rithemelimit dhe Partisë së Lirisë, të cilët kundërshtonin ligjin për shkak se ai bie ndesh me Kushtetutën.
Që nga 1 janari i këtij viti, profesionistët e lirë që ofrojnë shërbime në 26 lloje aktivitetesh dhe 169 profesione, ishin të përfshirë në një skemë të re tatimore. Ata me të ardhura vjetore deri në 14 milionë lekë duhet të paguanin tatim 15%, ndërsa ata me të ardhura mbi këtë nivel, 23%. Megjithatë, kjo skemë shkaktoi pakënaqësi të mëdha dhe debate për shkak të shifrave të papërballueshme të tatimit.
Vendimi i Gjykatës Kushtetuese për shfuqizimin e nenit 69 dhe nenit 4 të VKM 753/2023, vjen si një lehtësim për profesionet e lira, duke i kthyer ata në trajtimin e mëparshëm si biznese të vogla, me tatim zero për qind.
