Presidenti i Partisë së Lirisë, Ilir Meta, ka zhvilluar sot një takim me banorët e Roskovecit, ku ka shprehur qëndrimin e tij të fortë kundër ndërtimit të Termocentralit (TEC). Meta ka krahasuar ndërtimin e TEC-it me inceneratorët, të cilët janë përballur me kritika të ashpra për korrupsion dhe keqmenaxhim.
Gjatë fjalës së tij, Meta ka deklaruar: “Le të shkojë kompania greke ta bëjë në Greqi TEC-in, ç’punë ka me Roskovecin? Dhjetra hektarë sera që janë investuar e marrin 0 mbështetje nga shteti. Të dashur banorë, jam këtu me ju kundër kësaj veprimtarie kriminale që është sy pika uji me inceneratorin.”
Meta gjithashtu ka kritikuar qeverinë për politikat e saj, duke pretenduar se po bëhet gjithçka për të shpopulluar vendin dhe për ta mbushur atë me punëtorë nga Filipinet dhe Bangladeshi. “Duan t’ju përzënë e t’ju zhvlerësojnë investimet që keni bërë. Duan që edhe fëmijët t’i përzënë nga vendi e t’ju sjellin bangladeshas e filipinas,” ka thënë ai.
Ai ka shprehur habinë e tij për emrin e një figure të përfshirë në projekt, duke aluduar për një lidhje familjare me një person të njohur historikisht si palaço. “U habita kur pashë një emër Agaçi tek rruga, qenka nip këtej. Edhe Hamzai Kastrioti e kishte emrin, por ishte palaço. Të ketë turp Agaçi është bërë palë me Ramën sepse e kanë menduar kollaj për të nënshtruar këtë zonë,” ka shtuar Meta.
Takimi në Roskovec është parë si një pjesë e përpjekjeve të Partisë së Lirisë për të mobilizuar mbështetjen lokale kundër projekteve të kontestuara të qeverisë dhe për të ngritur zërin kundër politikave që, sipas tyre, po dëmtojnë interesat e qytetarëve dhe të ardhmen e vendit.
