Gjykata e Apelit të Posaçëm ka deklaruar të mbyllur shqyrtimin e çështjes së Fredi Belerin dhe ka shtyrë marrjen e vendimit për në datën 25 qershor. Beleri kundërshton masën e dhënë nga Gjykata Antikorrupsion, ndërsa avokatët e tij kanë kërkuar shpalljen e tij të pafajshëm. Prokurori i posaçëm ka kërkuar nga Apeli që të lërë në fuqi vendimin e shkallës së parë.
Kujtojmë se kryebashkiaku i zgjedhur i Himarës, Fredi Beleri fitoi në zgjedhjet e Parlamentit Evropian si pjesë e listave të Kyriakos Mitsotakis. Ai është dënuar me dy vite burg për korrupsion në zgjedhje, vendim të cilin e ka ankimuar në Apel pas dënimit nga Gjykata e Posaçme Kundër Korrupsionit dhe Krimit të Organizuar (GJKKO).
Beleri u arrestua dy ditë para zgjedhjeve lokale të 14 majit, pas një hetimi të nisur nga Prokuroria e Vlorës më 8 maj. Dyshimet ishin se shtabi elektoral i kandidatit të koalicionit “Bashkë Fitojmë” po shpërndante para në këmbim të votave.
Në 5 mars të këtij viti, Fredi Beleri u dënua me dy vite burgim nga GJKKO, duke u shpallur fajtor për veprën “korrupsion aktiv në zgjedhje”. Bashkë me të, Pandeli Kokoveshi u dënua me një vit e gjashtë muaj burg, por dënimi me burg për të është pezulluar dhe ai do të qëndrojë tre vite në shërbim prove.
Çështja Beleri ka tërhequr vëmendje të madhe publike dhe mediatike, për shkak të përfshirjes së figurave të njohura politike dhe ndikimit të saj në zgjedhjet e fundit.
