Ditën e sotme, ashtu edhe siç ishte paralajmëruar më parë opozita do të zhvillojë protestën e parë pas zgjedhjeve të 30 qershorit. Kjo do të jetë protesta e 10 kombëtare, ku kreu i PD u ka bërë thirrje shqiptarëve që të bëhen bashkë kundër diktaturës dhe të mbrojnë dinjitetin e familjeve dhe fëmijëve të tyre.
Ndërsa kryetarja e LSI-së, Monika Kryemadhi deklaroi se të rinjtë duhet t’i bashkohen protestës për një Shqipëri europiane.
Ditën e djeshme, ai që reagoi lidhur më protestën që do të mbahet sot në orën 20:00, ishte kryeministri Edi Rama. Ai citoi një shprehje të Martin Luther King: “Protestat e dhunshme ndjellin humbje”.
Presidenti Ilir Meta, para disa ditësh dekretoi edhe datën 13 tetor për ditën e zgjedhjeve.
Kujtojmë këtu se ditën e sotme po ashtu do të mblidhet edhe Parlamenti në një seancë të posaçme. Kjo seancë plenare do të fillojë në orën 17:00 ku pritet të vijojnë edhe procedurat për shkarkimin e presidenti Meta.
Presidenti Meta akuzohet nga mazhoranca për shkelje të Kushtetutës, me dekretin për shfuqizimin e datës së zgjedhjeve më 30 qershor.
Seanca pritet të përfundojë përpara nisjes së protestës. Kujtojmë që orari i seancës plenare u ndryshua për të evituar përplasjet.
