Tifozat Kuq e Zi kanë reaguar pas vendimit të Federatës Shqiptare të Futbollit për të aplikuar bashkë me Serbinë si vende pritëse për Kampionatin Evropian të Shpresave (U-21) në vitin 2027. Në fillim të marsit 2024, mediat raportuan se Serbia kishte aplikuar vetëm për këtë ngjarje, por UEFA i kërkoi që të bashkëpunonte me Shqipërinë.
Serbia ka një histori të ngarkuar me krime dhe gjenocid ndaj shqiptarëve, dhe tifozët e saj janë dënuar nga UEFA për racizëm dhe dhunë. Për më tepër, ngjarjet e 14 tetorit 2014, ku lojtarët e Shqipërisë u sulmuan në Beograd, nuk janë harruar. Tifozët serbë kanë vazhduar të përhapin parulla urrejtjeje edhe në ndeshje ku ekipet shqiptare nuk janë të përfshira.
“Sporti duhet të promovojë paqe, bashkëpunim dhe mirëkuptim,” theksojnë Tifozat Kuq e Zi. Ata shtojnë se Federata Shqiptare e Futbollit duhet të ishte konsultuar më parë për të organizuar kampionatin së bashku me Maqedoninë e Veriut apo Malin e Zi.
Ata kritikojnë Federatën Shqiptare të Futbollit që ka vendosur të bashkëpunojë me Serbinë, duke anashkaluar Kosovën dhe duke shkelur interesat etnike. “Fqinjë kemi boll, s’kemi pse kapërcejmë Kosovën për t’i dhënë ndihmë Serbisë,” përfundojnë ata.
