Zgjedhjet e këtij viti kanë kaluar qetësisht edhe pse kanë qenë zgjedhjet më të çuditshme që janë mbajtur ndër vite. E themi këtë për arsye se kanë qenë zgjedhje pa garë, por edhe pse kanë qenë kështu, manipulimet për vota nuk kanë qenë të pakta.
KQZ ka reaguar nëpërmjet një deklarate, pasi shumë media publikuan për rezultatet e zgjedhjeve në disa qytete, ku kishte më shumë vota se votues.
Zëdhënësja e KQZ, ka deklaruar se pjesëmarrja e publikuar ditën e djeshme, mund të ketë gabime, pasi është marrë në rrugë operative. Pra, KQZ është gati të pranojë se ka deklaruar një pjesëmarrje të gabuar, se sa të vërtetohet se Rilindja ka mbushur kutitë e votimit.
Deklarata e KQZ:
Komisioni Qendror i Zgjedhjeve vlerëson të sqarojë se, sikundër është theksuar si nga zëdhënësja dhe drejtuesi i KQZ, të dhënat e pasqyruara nga KQZ në intervale periodike kohore gjatë ditës së djeshme dhe që gjenden edhe në faqen online të institucionit, janë informacione të siguruara në rrugë operative (me telefon) nga Komisionet e Qendrave të Votimit.
Është theksuar disa herë se, këto nuk janë rezultate përfundimare, dhe si të tilla mund të ketë edhe mospërputhje, të cilat me seriozitetin më të madh do të adresohen nga KQZ në momentin e nxjerrjes së rezultatit përundimtar të votimit.
Kjo është një vendimmarrje shumëvjeçare e legjislatorit shqiptar përmes Kodit Zgjedhor dhe vendimmarrjes së KQZ-së ndër vite që, në dilemën për të mos dhënë asnjë informacion apo për të dhënë një informacion paraprak, ka zgjedhur këtë fundit, në mënyrë që ti mbajë qytetarët të informuar, por pa pretenduar saktësinë absolute, e cila vjen vetëm në përfundim të procesit.
Ky është një fenomen i cili është evidentuar në çdo proces zgjedhor, por duke qenë se vëmendja kryesore ka qenë tek rezultati, ndërkohë që aktualisht është edhe tek pjesëmarrja, këtë radhë po evidentohet me dukshëm.
Kjo problematikë e mbarsur mund të zgjidhet vetëm në rast se procesi i votimit bëhet tërësisht përmes teknologjisë.
