Për të fituar një vend pune në Shqipëri duhet të jesh patjetër anëtar i një partie politike, ndërsa për ta humbur atë, mjafton të ngresh zërin për çështje që cenojnë interesat e po kësaj partie.
Piranjat kanë sjellë rastin e specialistes së bibliotekës Lezhë, Lula Lleshi, e cila është pushuar padrejtësisht nga puna si pasojë e aktivizmit politik të vajzë së saj.
‘Punoj prej 24 vitesh në bibliotekën e Lezhës si specialiste. Pas zgjedhjeve të 24 majit jam thirrur nga drejtori i Kulturës, Renaldo Xhanaj dhe më ka thënë të jap dorëheqjen, sepse ‘ju nuk keni votuar për ne’.
Pas publikimit që vajza ime e bëri në rrjetet sociale për këtë problem është përgjigjur kryetari dhe ka mohuar të ketë ndodhur kjo. Të nesërmen Renaldo më erdhi dhe më kërkoi ndjesë: ishte një keqkuptim, nuk të lëviz njeri nga puna dhe u përul sa ndjeva keqardhje. Pas ca kohësh, më kërkuan në bashki një takim dhe më thanë që do më çonin në njësinë Ungrej.
Donin të më çonin atje kur unë jam specializuar për bilbiotekonomi, ndërkohë që punoj prej vitesh këtu, banoj këtu dhe të më dërgojnë në një vend ku nuk ka transport, nuk ka bibliotekë atje. Njësia është 1 ore larg, transport jo dhe mua nuk më del as rroga për naftë. Kjo është diskriminuese që më dërgojnë mua, një specialiste biblioteke’.
Pra, nga 4 punonjëse u zgjodh pikërisht zonja Lula për t’u transferuar.
‘E kundërshtova. Për 2023 vërtet ka rënë nr i lexuesve për gjithë bibliotekën, por kjo sepse kemi qenë në rikosntruksion. Nga shtatori kemi qenë duke sistemuar, por kjo nuk është për fajin tim. Por edhe pse ka rënë, unë prapë kam nr më të madh të lexuesve në gjithë bibliotekën. Pas kësaj, ata vendosën të më hiqnin nga puna’.
Lidhur me këtë problem, përgjegjësi i bibliotekës duket i pafuqishëm për të mbrojtur punonjësen e tij më të vjetër.
‘Ne do bëjmë organizimin brenda stafit nëse bashkia bën shkurtimin e një punonjësi. Unë personalisht jam që asnjë punonjës të mos hiqet nga puna. Për mua po të jenë 4 apo dhe 5 punonjës është shumë mirë, se unë e kam bërë kërkesën për shtim stafi, por strukturën e punonjësve e cakton Bashkia dhe ne jemi në varësi të bashkisë Lezhë’.
Përballë kësaj situate, drejtori i Kulturës, Renaldo Xhani, nuk mban asnjë përgjegjësi.
‘Drejtohuni bashkisë dhe ju kthejmë përgjigje. Është marrë vendimi, sepse është shkurtuar një pozicion pune në organikë. Ka pasur rënie të sektorit të bibliotekës. Nuk ka të bëjë me aktivizëm politik’.
Ndërsa personaliteti më i rëndësishëm i asaj bashkie, kryetari Pjerin Ndreu përsërit refrenin: bëni kërkesë me shkrim, teksa largohet me makinë./Syri.net
