Ministri i Brendshëm, Taulant Balla, ka mbajtur një takim me Drejtorin e TikTok për Politikat Publike dhe Marrëdhëniet me Qeverinë për Evropën Qendrore dhe Lindore, Jakub Olek. Gjatë takimit, ministri Balla ka shprehur shqetësimet e tij lidhur me ngjarjet e fundit dhe ka theksuar nevojën për të intensifikuar vigjilencën kundër dhunës, dezinformimit, shantazheve dhe gjuhës së urrejtjes online. Ministri gjithashtu ka kërkuar informacion të detajuar mbi ruajtjen dhe përdorimin e të dhënave personale të përdoruesve në platformën TikTok.
Drejtori i TikTok, gjithashtu ka informuar mbi masat që po ndërmerr për të rritur nivelin e moderimit të postimeve në gjuhën shqipe dhe ka prezantuar mundësitë që ofron aplikacioni për denoncimin e rasteve dhe kontrollin prindëror mbi postimet e fëmijëve. Ministri Balla i ka kërkuar kompanisë TikTok të vendosë pikat e përhershme të kontaktit me Policinë e Shtetit dhe të ofrojë përgjigje të shpejtë për rastet e denoncuara. Ai ka theksuar urgjencën e rritjes së vëmendjes për kontrollin e postimeve në gjuhën shqipe dhe mbi çështjet e sigurisë online, duke përfshirë verifikimin e moshës dhe identitetit të përdoruesve.
Ministria e Brendshme po studion përmirësimet ligjore të ndërmarra nga Bashkimi Europian, siç janë Akti i Shërbimeve Digjitale dhe Akti i Tregjeve Digjitale, me qëllim të krijimit të një hapësire digjitale në Shqipëri ku të drejtat dhe detyrimet e përdoruesve janë të mbrojtura dhe të përcaktuara qartë, tha ministri Balla në përfundim të takimit.
