Ezgjan Alioski është futbollisti me origjinë shqiptare i cili së fundmi ka kaluar një situatë aspak normale në një nga restorantet në Prilep të Maqedonisë.
Alioski ka qenë duke drekuar me familjen e tij dhe me të tjerë familjarë, ndërkohë që pronari i lokalit i ka nxjerrë jashtë për shkak se kishte dëgjuar se në tavolinën e tyre flitej shqip.
Vetë futbollisti shqiptar ka dhënë një intervistë në kanalin “Klan Macedonia”, ku është shprehur se ndihet shumë i irrituar për atë që ka ndodhur në restorant.
Ngjarja ka marrë përmasa të mëdha dhe është konsideruar një skandal i vërtetë nga shumë media dhe personazhe të ndryshëm publikë, duke i ardhur në mbështetje futbollistit shqiptar.
Alioski është shprehur se ai luan për ekipin e Maqedonisë dhe se kishte ardhur nga Anglia për të luajtur për këtë ekip dhe ja se çfarë i kishte ndodhur atij.
Futbollisti më tej ka thënë se ai nuk e fsheh asnjëherë se është shqiptar dhe se në lidhje me ngjarjen ka shtuar se uron që kjo gjë të mos i ndodhë askujt.
“Jam vërtet i irrituar me atë që ndodhi në Prilep. Unë luaj për ekipin e kombëtares së Maqedonisë. Vij nga Anglia për të luajtur dhe ja çka përjetoj këtu. Unë më të afërmit e mi kemi folur gjuhën amtare dhe një njeri erdhi dje më tha se duhet të largosha nga restoranti vetëm për këtë gjë. Ai kishte dëgjuar që unë po flisja shqip me familjen time. Unë nuk kam koment, vetëm uroj që të mos i ndodhë askujt kjo gjë”, tha si përfundim futbollisti shqiptar.
