Hellas Verona luajti një ndeshje të shkëlqyer kundër Interit në “San Siro”, por përfundoi pa pikë pas humbjes 2-1. Skuadra e Marco Baronit kishte një mundësi të shkëlqyer për të barazuar në minutën e 100-të, por Thomas Henry gaboi një penallti.
Sulmuesi francez, autor i golit të përkohshëm të barazimit në minutën e 74, goditi shtyllën. Kjo situatë e çoi në një reagim të ashprë nga tifozët, duke i bërë edhe kërcënime me jetë për gabimin e bërë. Në rrjetet sociale, 29-vjeçari ka reaguar duke shprehur se ai dhe familja e tij janë kërcënuar me jetë.
“Për ata që mendojnë se dinë futbollin më mirë se të tjerët dhe ofendojnë familjen time duke dëshiruar vdekjen, shpresoj që një ditë të gjejnë paqen në jetën e tyre. Gabimet janë pjesë e lojës, dhe për këtë arsye do të vazhdoj të punoj për të përmirësuar performancën time. Një ditë fitoj, një ditë humb, një ditë shënoj, një ditë gaboj. Kjo është jeta ime si futbollist. Jam krenar që shënoj golin tim të dytë në karrierë në ‘San Siro’ pas një periudhe dëmtimi të ligamentit. Gjithmonë me kokën lart, gjithmonë përpara,” shkroi Henry në një postim të tij.
