Policia e Shtetit ka njoftuar sot se janë regjistruar dy raste të ngjashme me atë të kopshtit “4 Stinët” në kryeqytet, ku edukatorja dhunoi fëmijën 3-vjeçar.
Sipas informacioneve bëhet me dije se ditën e djeshme është paraqitur në spital një i mitur 4 vjeç. Prindërit kanë deklaruar se fëmija është dëmtuar duke luajtur me bashkëmoshatarët e tjerë, në një kopësht në rrugën “Peti”.
Gjithashtu është paraqitur në spital edhe një i mitur 2 vjeç, që frekuenton një çerdhe në rrugën “Dalip Zavalani”. Ai kishte marrë dëmtime në pjesën e krahut.
Policia po merret me mbledhjen e pamjeve filmike për veprime të mëtejshme procedurale për këto dy raste të rënda.
NJOFTIMI:
Më datë 10.11.2023, është paraqitur në spital për ndihmë mjekësore një i mitur 4 vjeç, i cili sipas deklarimeve të prindërve, është dëmtuar duke luajtuar me një bashkëmoshatar, në një kopësht në rrugën “Peti”.
Më datë 10.11.2023, është paraqitur në spital për ndihmë mjekësore një e mitur 2-vjeçare, e dëmtuar në pjesën e krahut, e cila frekuenton një çerdhe në rrugën “Dalip Zavalani”. Shërbimet e Policisë kanë sekuestruar DVR-në me pamjet filmike të çerdhes që frekuenton e mitura, për veprime të mëtejshme procedurale, dhe materialet i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për vlerësim.
