Një 26-vjeçar ka rënë në prangat e Policisë në Himarë, pasi ka thyer rregullat e qarkullimit dhe ka kundërshtuar punonjësit e policisë.
I riu A.H nga Himara mbrëmjen e djeshme ka drejtuar motomjetin në sens të kundërt dhe pa dokumentacion të rregullt. Gjatë veprimeve procedurale, ka kundërshtuar punonjësit e policisë rrugore dhe ka thyer xhamat e pasmë të automjetit të policisë.
“Në vijim të veprimeve procedurale dhe hetimore të kryera nga oficeri i Policisë Gjyqësore i Prokurorisë pranë Gjykatës së Shkallës së Parë të Juridiksionit të Përgjithshëm Vlorë, u bë arrestimi në flagrancë i shtetasit A. H., 26 vjeç, banues në Himarë.
Mbrëmjen e djeshme, në rrugën e Portit, Himarë, është konstatuar nga shërbimet duke drejtuar motomjetin në sens të kundërt dhe pa dokumentacion të rregullt dhe gjatë shoqërimit për veprime të mëtejshme procedurale, ka kundërshtuar punonjësit e Policisë si dhe ka thyer xhamat e pasmë të automjetit të Policisë. Materialet iu referuan Prokurorisë, për veprime të mëtejshme”, thuhet në njoftimin e policisë.
