Para dy ditësh janë arrestuar 3 efektivë policie pasi u zbulua se ata kultivonin kanabis në repartin në Zall-Herr.
Një muaj më parë në samitin e NATO-s në Vilnus, Shqipëria mori angazhim se do të shtojë buxhetin deri në 2% për ushtrinë, ndërsa kryeministri Rama tha se vendi ynë është i gatshëm të shtojë trupat në operacionet luftarake. Por në vend të ndihmës për NATO-n, Shqipëria ka ofruar një skandal të përmasave ndërkombëtare, që njollos forcat më të mira të ushtrisë tonë.
Parcelat me kanabis që u gjetën në Zall-Herr i përkasin reparti ku janë forcat elitë të ushtrisë shqiptare. Ata kalojnë një stërvitje në kushte ekstreme dhe përgatiten për goditje direkte në operacione luftarake. Një ndër funksionet kryesore të komandove të Zall Herri është edhe zbulimi special, por gjetja e 125 bimëve të kanabisit brenda në repart ka vënë në dyshim tashmë gjithçka ndodh në radhët e tyre.
Mësohet se rrënjët e kanabisit janë zbuluar nga avioni i Guardia di Finanza që monitoron territorin shqiptar. Bimët ishin rritur dhe janë pikasur menjëherë nga pajisjet e italianëve që kanë sinjalizuar policinë shqiptare.
Kujtojmë që më herët kryeministri Edi Rama i konsideroi satelitët |’Albania 1’dhe ‘Albania 2’ si efektivë në zbulimin e paracelave ku kultivohen lëndë narkotike.
“Kanabisi, tanimë është shumë më e lehtë për agjencinë ligj zbatuese, për drejtuesit, por edhe për drejtimin politik të Ministrisë së Brendshme dhe qeverisë domethënë për të pasur qartësi të plotë jo thjesht mbi sa sipërfaqe konstatohet e tillë, por edhe me sa ndërhyhet në çdo sipërfaqe”, ka thënë para një muaji Rama teksa fliste për efektet pozitive të vendosjes së satelitëve.
Ndërkohë që ndodhemi përballë zbulimit të kultivimit të kanabisit në mënyrë masive në Zall-Herr dhe përfshirjes së 3 efektivëve të policisë, mund të konsiderohet i dështuar veprimi i satelitëve që Rama prej më shumë se një viti iu bën ‘marketing’.
