Është shtyrë sërish seanca gjyqësore për “monstrën” e Selenicës, autorin e masakrës me 8 viktima në gusht të vitit të kaluar. Seanca është shtyrë për mosformatim të trupit gjykues. Zykaj është sjellë në gjykatë nga forca të policisë, por nuk është futur në sallë të gjyqit duke u larguar sërish pas disa minutash.
Ritvan Zykaj do duhet të presë deri më 4 qershor për të mësuar fatin e tij, nëse gjykata do ta dënojë përjetë apo me disa dekada burg për krimin makabër që kreu ndaj 8 familjarëve të tij në Resulaj të Selenicës.
Në gjyq ishin të pransishëm gjyshi dhe xhaxhai i Zykajt. Ata nuk kanë pranuar të flasin për kamerat, por jashtë tyre janë shprehur se nuk e kanë takuar Ritvanin dhe as që kanë ndërmend ta bëjnë diçka të tillë.
“Nuk e dimë ku kanë shkuar familjarët e tjerë. Dhe nuk e dimë pse na sjellin në gjykatë. Të marr dënimin që meriton. Nuk e kemi takuar, dhe nuk kemi pse ta takojmë. Na mbylli dyert, të dënohet. Ne nuk kemi pse vijmë në gjykatë”- ka thene gjyshi i Ritvanit.
Prokuroria e Vlorës kërkoi burgim të përjetshëm për Zykajn. Ritvan Zykaj vrau me armë zjarri tetë persona, nga të cilët dy të mitur. Demir Zykaj 76 vjeç, Perri Zykaj 76-vjeç, Besim Zykaj 45-vjeç (i biri), Vasilika Zykaj 40 vjeç (bashkëshorte e Besimit), Sara Zykaj 17 vjeçe (vajza e Besimit) Ledion Zykaj 6 vjeç (djali i Besimit), Azem Zykaj 49 vjeç (i biri), Afërdita Zykaj 47- vjeç (bashkëshorte e Azemit) ishin 8 personat që u vranë nga dora e Ritvan Zykajt. Në deklaratat e tij të para autori i masakrës tha se i vrau për shkak se e akuzonin për vjedhjen e pulave.
