Ditën e sotme pati një përplasje midis kampit të MEK në Manëz të Durrësit dhe Policisë së Shtetit.
Teksa sapo është mbyllur protesta e muxhahedinëve, një prej tyre në një prononcim për “EuroNews Albania” rrëfeu momentin ekontrolleve nga Policia. Sipas saj i gjithë aksioni që policia ndërmori sot në kampin e tyre lidhet me negociatat që qeveria shqiptare ka bërë për t’i dëbuar ata nga vendi. Gjithashtu ngrihet shqetësimi policia është futur në dhomat e tyre dhe ka kontrolluar madje edhe gjërat personale të vajzave dhe grave, pavarësisht kundërshtimit nga ana e tyre.
“Ne ishim në një ditë normale dhe pamë gjithë vendin rreth nesh të kontrollohej. Nuk kuptuam çfarë po ndodhte. Kjo na kujton se çfarë na ndodhte në vendin tonë, në Iran. Si mund të hynin në dhomat tona ku ndodhen vetëm vajzat, motrat tona?! Si mundet të kontrollosh sendet personale të motrave tona?! Ne i thamë të mos e bënin një gjë të tillë, se s’kemi bërë asgjë. Ata nuk na dëgjuan. Ata na sulmuan dhe goditën dy nga vëllezërit e mi. Ne kemi gjithë të drejtat për të qëndruar këtu, pse na e bëri Shqipëria këtë. Ne kemi 6 vite këtu, ata duan të na nxjerrin. Ata s’kishin të drejtë të vinin këtu. Gjithçka është duke ndodhur për shkak të një negociate që është duke u bërë”, tha gruaja.
