Mbedhja e përbashkët midis dy qeverive asaj të Kosovës dhe Shqipërisë është anuluar mbrëmjen e djeshme nga kryeministri Rama.
Ndërkohë që edhe opozita në Kosovë ka reaguar ashpër pas këtij vendimi, teksa kryetari i Partisë Demokratike të Kosovës , Memli Krasniqi, e cilësoi alarmante situatën në të cilën ndodhet vendit.
“Alarmuese! Në kohën kur të gjithë aleatët perëndimorë janë të zhgënjyer me Qeverinë e Kosovës, ne kemi nevojë për Shqipërinë më shumë se kurrë”, shkroi Krasniqi.
Teksa kreu i LDK-së, Lumir Abdixhiku, e cilësoi këtë vendim një lajm të keq për shqiptarët, në Kosovë, Shqipëri, Luginë, Maqedoni e Mal të Zi.
Gjithashtu ai tha se, Kosova fatkeqësisht vazhdon të rrugëtojë drejt izolimit e vetmisë.
“Këtë herë, si asnjëherë, mbetëm dhe pa Shqipërinë. Po mbesim dhe do të mbesim pa secilin aleat që qëndronte me ne në çdo etapë të vështirë. Kjo s’është Kosova që e kishim menduar ndonjëherë”, shkroi në rrjetet sociale Abdixhiku.
Sipas kreut të LDK, rrugëtimi përplasës me Perëndimin i Kurtit, rrezikon vetë shtetësinë e Republikës.
“Në vend se të sillet si një Kryeministër i përgjegjshëm, një që ruan partneritetet e avancon kauzat kombëtare drejt perëndimit, ai sjellë krizë dhe izolim. Aventura e tij politike nuk mund të jetë përfaqësimi ynë popullor. Kosovës i duhen miqtë. Kosovës i duhen partnerët strategjik”, përfundoi Abdixhiku.
