Një shtetas shqiptar nga Kosova është arrestuar në Budva pasi dyshohet si vrasës me pagesë.
Lajmin e ka bërë të ditur gazeta malazeze “Vijesti,” ku shkruan se arrestimi është bërë katër ditë më parë nën dyshimin se 30-vjeçari Bajram Pista kishte shkuar në qytetin bregdetar malazez i ngarkuar për të vrarë anëtarin e njërës prej dy klaneve kriminale që janë në konflikt.
Jo zyrtarisht, gazetës “Vijesti” i është thënë se inspektorët e policisë në Budva janë duke hetuar edhe se kush ka qenë në përkrahje të Pistës në këtë qytet, sepse besohet që disa persona kanë pasur kontakt me të dhe i kanë ofruar ndihmë logjistike.
Sipas gazetës, Pista është arrestuar më 29 prill, në një banesë në hyrje të Budvës. Thuhet se i arrestuari është nga Rahoveci, dhe se në momentin e arrestimit atij i janë gjetur edhe armë, municion, heroinë dhe një telefon i koduar.
