Lidhur me tensionet dhe dhunën në veri të Kosovës ka reaguar edhe kryeministri Edi Rama. Me anë të një postimi në ‘Twitter’, kryeministri i Shqipërisë Edi Rama bën thirrje që të mos ecet më tej në këtë shteg jo vetëm të rrezikshëm, por sipas tij edhe krejt të panevojshëm sot. Në këtë mënyrë, kreu i qeverisë shqiptare bashkohet me qëndrimin e Shteteve të Bashkuara të Amerikës, të cilët dënuan aksionin e policisë kosovare dhe i bënë thirrje Kurtit të ndalë provokimet.
“A e ndihmon kjo që po ndodh në Kosovë procesin ku janë angazhuar të tërë miqtë e mëdhenj të Kosovës e të shqiptarëve, për normalizim dhe njohje të ndërsjellë mes Kosovës dhe Serbisë?! Me siguri jo përderisa vetë miqtë tanë më të mëdhenj shprehen thellësisht të shqetësuar! Unë bashkohem me ta në apelin për të mos ecur më tej në këtë shteg jo vetëm të rrezikshëm, po edhe krejt të panevojshëm sot, kur bota demokratike e ka vendosur në qendër të vëmendjes dialogun, normalizimin, njohjen e ndërsjellë mes Kosovës dhe Serbisë”, shkruan Rama.
Theksojmë që një ditë pas betimit të komunave me shumicë serbe, sot qytetarët e komunitetit serb u grumbulluan para objektit komunal në Zveçan. Pjesëtarët e Policisë së Kosovës kanë rrethuar ndërtesat e komunës Zubin Potok, Zveçan dhe Leposaviq, pas së cilës kanë rënë sirenat për alarm. Policia përdori gaz lotësjellës për të shpërndarë turmën, ndërsa u dëgjuan edhe të shtëna.
