Kanë dalë në pah fotot dhe identiteti i shqiptarit i mbetur i vdekur disa ditë më parë në burgun famëkeq të Trikalasë në Greqi.
Ergest Alija 29 vjeç me origjinë nga Librazhdi është shqiptari që është therur për vdekje nga dy rusë në burgun e Trikalës. Sipas policisë greke, shqiptari u qëllua me thikë nga 2 të burgosur rusë, megjithëse rrethanat e krimit ende nuk janë zbardhur plotësisht.
Alija dyshohet se ka humbur jetën pas një përleshjeje me thika në burgun e Trikalës. Policia greke tha se i dyshuari kryesor për plagosjen dhe vrasjen e Alisë është një rus, që më pas ka tentuar të kryejë vetëvrasje, shkruajnë mediat e vendit fqinj.
Edhe pse shqiptari u dërgua në spital, sërish nuk mundi që të shpëtonte. Ai kishte marrë plagë të rënda në gjoks, brinjë dhe këmbë. Trupi i tij u dërgua në morgun e spitalit, ku do t’i nënshtrohet ekspertizës mjeko-ligjore. Prokuroria e Trikalës ka nisur hetimet për ngjarjen e rëndë.
Sipas burimeve të “balkanweb” një nga kushërinjtë e largët të shqiptarit që mbeti viktimë në burgun grek ka rrëfyer se prindërit e tij kishin humbur edhe dy vëllezërit e tij më të vegjël kohë më parë e tani dhimbja i ka pushtuar trefish pas humbjes së djalit të madh. Kujtojmë se në burgjet greke, sidomos në atë të Trikalës kanë ndodhur një sërë ngjarjesh të bujshme kriminale, ku viktima kanë mbetur edhe shumë të burgosur shqiptarë. Kujtojmë se që në fillim të vitit janë regjistruar 5 viktima në burgjet greke, ku katër prej tyre janë shqiptarë dhe vetëm një grek. Burgjet në Greqi ofrojnë shumë pak siguri dhe për këtë arsye i është tërhequr veshi disa herë nga Gjykata Evropiane e të Drejtave të Njeriut.
