Pas humbjes së thellë që Partia Demokratike pësoi në zgjedhjet lokale të 14 Majit, shumë zhvillime po ndodhin në selinë blu.
Raportohet nga “Balkan Web” se ish-kreu i PD-së Lulzim Basha do të rikthehet në angazhimin e tij politikë. Mësohet se Basha do të zhvillojë një takim pasditen e sotme me të rinjtë, ku ende nuk dihet se cilat do të jenë çështjet që do të diskutohen. Kjo lëvizje e Bashës vjen pas disfatës së thellë që pësoi opozita në zgjedhjet vendore, ku humbi edhe bastionin historik të saj, Shkodrën.
Ndërkohë nga ana tjetër ish-kryeministri Sali Berisha ka njoftuar sot se do të mbledhë grupin e tij parlamentar. Mësohet se mbledhja do të nisë në orën 13:00. Sakaq, kreu i grupit parlamentar të PD-së, Gazment Bardhi do të zhvillojë mbledhje grupi me çështje diskutimi, ligjin për pagat që pritet të votohet nesër në Parlament. Vlen të sjellim në vëmendje se Basha dha dorëheqjen nga drejtimi i Partisë Demokratike një vit më parë pas zgjedhjeve të pjesshme të 6 marsit dhe në krye të PD-së u vendos Sali Berisha. Pas vendimit të gjykatës, PD u drejtua nga kreu në detyrë Enekelejd Alibeaj. Rikthimi i Bashës u paralajmërua nga disa analistë, teksa dhe deputeti i PD-së Gazment Bardhi foli për këtë lëvizje të tij.
