Teksa në ekzekutimin e biznesmenit Ardian Nikulaj në Shëngjin u përfshinë 3 britanikë, ditën e sotme dy hetues anglezë kanë mbërritur në prokurorinë e Lezhës.
Sipas burimeve, pas kërkesës për ekstradim të shtetasve britanikë, të dyshuar si të implikuar në vrasje, hetuesit kanë ardhur për t’u njohur me provat.
Vlen të kujtojmë që Edmond Haxhia, 37 vjeç, Steven Hunt, 49 vjeç dhe Thomas Mathin, 35 vjeç, u arrestuan në Britani, ndërsa akuzohen për atentatin ndaj 51-vjeçarit Ardian Nikulaj në lokalin e tij, Coral, në Shëngjin, ngjarje e cila besohet se ndodhi si pasojë e gjakmarrjes. Haxhia dyshohet se është porositësi i vrasjes, pasi mes dy fiseve ka pasur konflikte të vazhdueshme që datojnë që nga viti famëkeq i 97-ës.
Disa ditë me parë media britanike “Daily Mail” i ka kushtuar një shkrim kësaj ngjarje të ndodhur më 19 Prill në Shëngjin, ku mbeti viktimë biznesmeni Ardiaan Nikulaj teksa ndodhej në biznesin e tij.
Duke cituar burime policore, ajo thotë se vrasja e biznesmenit Ardian Nikulaj ka ndodhur si pasojë e një mosmarrëveshje të gjatë për 80,000 paund, mes dy familjeve.
“Policia beson se vrasja erdhi si pasojë e një mosmarrëveshjeje mbi 80,000 £ mes dy familjeve”, thotë artikulli, ndërsa vijon “Gruaja britanike Harriet Bridgeman, 28 vjeç, thuhet se është arrestuar në lidhje me vrasjen.”
