Partia Socialiste po bën 10 vite radhazi në pushtet, ndërkohë që deliri nuk mungon nga ana e përfaqësuesve të saj.
Sekretari Organizativ i PS-së, Blendi Klosi i argumentoi fitoret e PS-së me aftësinë që ka për të punuar me të gjithë. Ndërkohë që analisti Neritan Sejamini e kundërshtoi fort Klosin duke thënë se arsyeja e vërtetë që Partia Socialiste ka fituar lidhet me faktin se tashmë ajo kontrollon të gjitha pushtetet dhe i përdor për të mbajtur pushtetin.
Sipas Sejaminit, PS ka kapur drejtësinë, ekonominë përmes klientelizmit si dhe mediat.
Analisti nuk kursehet ndaj Klosit teksa ishte në emisionin “Të Paekspozuarit” duke i thënë se PS ka krijuar një sistem autokratik që për momentin duket i qëndrueshëm. Sipas tij PS i zhavat qytetarët pastaj kur i intereson i shpërndan lekët në mënyrë që të arrijë plotësimin e objektivave të saj.
Siç është dhe rasti i fundit i premtimeve të kryeministrit Rama për shpërblimin e pensionistëve dhe rritjen e pagës mesatare në vendin tonë.
Biseda në studio
Sejamini: Blendi tha se ne fitojmë se punojmë me të gjithë. Po, fitohet edhe në Serbi, edhe në Turqi, Xhibuti, Burundi, edhe në Çad. Një parti fiton si ju në gjithë këto vendet. Por kjo nuk do të thotë se nëse këtu fitohet ka demokraci, qeverisje, drejtësi. Fitorja juaj është më afër atyre në Serbi, Rusi, Azerbajxhan dhe Bjellorusi. Ky nuk është problemi juaj, as i zgjedhjeve vendore, por problemi i shoqërisë dhe opozitës. Ju nuk fitoni se punoni dhe prodhoni, por fitoni sepse PS-ja sot kontrollon të gjitha pushtetet dhe këto i përdor për të mbajtur pushtetin. Ka kapur mediat, ekonominë përmes klientelizmit, drejtësinë.
Klosi: Ne garojmë me një parti, nuk e di me këtë parti garojmë. Bëheni ju siç u bëtë 2005 me KOP-in e famshëm që bëtë një parti të fortë, gjetët një mekanizëm, u bashkuat, fituat, nuk fituat me votat popullore se ne morëm 100 mijë vota më shumë, por morët pushtetin.
Ne nga 2005-2013 çfarë nuk kemi bërë, kemi punuar fort, që të fitonim në 2013. Tani të punojnë të tjerët, të grupohen, të garojnë me ne, mos e gjeni shkakun e fitores së një force politike te historitë që ju përmendët.
Është histori besimi. A besojnë njerëzit se mund të fitojë kjo partia pa emër, përfaqësuar nga një non grata dhe personazhe komplet të vjetër?
Sejamini: Kjo që thua ti është llogaritja elektorale. Unë po flas për sistemin politik në Shqipëri. Partia juaj është në pushtet, merr edhe të dhënat tona, i përdor, merr paratë dhe i jep kur ka interes. Sot jemi në një situatë kur ju nuk jeni në pushtet se punoni, bëni këto të mira që thoni. Ju jeni në pushtet, se keni ndërtuar një pushtet autokratik që për momentin është i qëndrueshëm. Është një pushtet sa i fortë duket rrëzohet. Ky lloj triumfalizmi dhe arroganca që ju keni, se jemi më të mirët dhe fitojmë, ka të bëjë me faktin se ju jeni autokraci dhe duke qenë se ka mungesë lirie, konkurence dhe demokracie, për momentin e keni më kollaj për të fituar.
