Teksa një numër i lartë krimesh dhe atentatesh kanë tronditur kryeqytetin muajt e fundit, theksi vendoset jo vetëm në parandalimin e ngjarjeve por edhe në zbardhjen e tyre.
Eksperti i kriminalistikës, Ervin Karamuço për “Top News” shprehet se duhet të ndryshojë metodologjia e policisë për të parandaluar vrasjet gjatë fundjavave.
Ndër të tjera, një tjetër problematikë e prekur nga eksperti i kriminalistikës është edhe nevoja për zhvillimin e mjeteve teknologjike në polici.
Sipas Karamuços, nëse do të ketë kamera sigurie në të gjitha zonat ku ndodh numri më i madh i vrasjeve dhe ku zakonisht autorët e tyre djegin automjetet, kapja e autorëve do të ishte më e lehtë.
“Nëse vijon ky trend i kapërcejmë numrin e viktimave të vitit të kaluar. Duhet të vendoset një teknologji e zhvilluar në policinë e shtetit. Kamerat mund të kishin ndihmuar shumë, mund të kishte ndryshuar metodologjia e policisë së shtetit. Mbas vrasjes së Don Boskos ka pasur takime. Vrasjet po ndodhin vetëm ditët e diela. Policia duhet të vendosë disa spote të tjera, për të gjetur rrugë të reja. Ne kemi një zonë afër Tiranës ku aty digjen makinat dhe aty nuk ka asnjë kamer. Pas çdo ngjarjeje ata lënë një firmë”, tha ndër të tjera Karamuço.
