Një aksident i rëndë hekurudhor i ka marrë jetën një minoreni shqiptar në Zvicër. Ngjarja mësohet të ketë ndodhur gjatë natës së të enjtes , ndërkohë që trupi është gjetur vetëm mëngjesin e së premtes së kaluar.
Trupi i 17-vjeçarit, i identifikuar si Rinor Bunjaku është gjetur në binarët e trenit në Oberglatt të Zyrihut, ndërkohë që vet jetonte në Rümlang, po ashtu të Zyrihut.
Deri më tani nuk ka asnjë të dhënë, e cila të mund të tregojë sesi kanë qenë rrethanat e aksidentit. E vetmja gjë që familjarët janë në dijeni është se minoreni është përplasur me trenin dhe trupi i pajetë është gjetur në mëngjesin e së premtes.
Trupi ende gjendet në dorë të policisë për shkak se janë duke u bërë të gjitha ekzaminimet e nevojshme, mirëpo familjarët kanë njoftuar se përcjellja për në banesën e fundit do të jetë në datë 3 maj.
Policia ende është duke hetuar ngjarjen, mirëpo deri tani nuk ka asnjë detaj të ri.
