Sërish lëvizje në Policinë e Shtetit, ku disa emra të rëndësishëm kanë marrë poste të reja dhe të tjerë janë shkarkuar. Mësohet se në policinë e Kavajës është shkarkuar nga detyra e shefit të komisariatit Emiljan Pasha, i cili është zëvendësuar me Gazmend Dermozin. Ndërkohë Pasha bëhet e ditur se do të mbajë detyrën e Specialistit për Narkotikët në Drejtorinë e Përgjithshme të Policisë në Tiranë.
Gjithashtu lëvizje janë raportuar edhe në Mirditë e Kukës. Bëhet me dije se Behar Caka emërohet shef Komisariati në Lezhë, ndërsa në Mirditë vendoset Paulin Çupi dhe në Kukës emërohet shef komisariati Julian Qyta. Ndërkohë që Dritan Meta emërohet shef i komisariatit në Laç.
Më herët, drejtori i Policisë së Shtetit Muhamet Rrumbullaku ka “aktivizuar” strukturat e policisë, duke u dhënë disa porosi përkatëse. Porositë kishin qëllim parandalimin e kultivimit të bimëve narkotike, një problem i evidentuar shumë pothuajse çdo ditë në zona të ndyshme të vendit tonë. Rrumbullaku ka bërë thirrje për të kontrolluar ambientet e mbyllura të dyshuara për kultivim të kanabisit, për kontroll të përjavshëm të terrenit, për kontrolle në bazë të analizës së riskut në pikat e kalimit kufitar dhe për patrullime të shtuara në kufirin tokësor dhe në atë detar.
