Pasditen e sotme një aksident i rëndë ka ndodhur në aksin Bulqizë- Shupenz, konkretisht në zonën e quajtur, Fushë Bulqizë. Bëhet e ditur se një automjet tip “Audi” ka dalë nga rruga, e për pasojë është lënduar rëndë drejtuesi i mjetit. Shoferi, Ramadan Meta, 25-vjeç ndodhet në gjendje të rëndë në spitalin e Bulqizës, teksa pritet helikopteri për ta transferuar në Tiranë.
“Bulqizë/Informacion paraprak
Rreth orës 16:10 në aksin rrugor Fushë Bulqizë-Shupenzë, shtetasi R.M., duke drejtuar automjetin tip “Audi”, ka humbur kontrollin mbi drejtimin e mjetit dhe mjeti ka dalë nga rruga.
Si pasojë ka mbetur i lënduar drejtuesi i mjetit i cili është dërguar për ndihmë mjekësore në spital.
Në vendngjarje ndodhet grupi hetimor, i cili po punon zbardhjen e rrethanave të aksidentit”, thuhet në njoftimin e Policisë së Shtetit.
Vlen të theksojmë se aksidentet rrugore kanë vijuar tendencën e tyre rënëse të ndjekur gjatë vitit 2022 edhe në muajin e parë të 2023-it.
Ndërkohë të dhënat e Institutit të Statistikave tregojnë se në janar 2023 numërohen 84 aksidente rrugore nga 107 të ndodhura në muajin Janar 2022.
“Numri i aksidenteve rrugore është ulur me 21,5%. Numri i të aksidentuarve (të vrarë dhe të plagosur) rezulton 119 persona nga 147 persona të aksidentuar në muajin Janar 2022” thuhet në publikim.
