Është bërë i mundur arrestimi i autorit të dyshuar për vrasjen e Briken Sanajt, mbrëmjen e 30 tetorit 2022 në Kodrën e Diellit. Gjelosh Krasniqi është arrestuar nga autoritetet në Pejë dhe bashkë me të është shoqëruar edhe personi që e strehoi në shtëpinë e tij.
Kështu ka bërë të ditur Shkodran Nikçi, zëdhënës i Prokurorisë Themelore në Pejë.
“Mbrëmë nga puna operative është arritur të arrestohet një person (me urdhër arrest ndërkombëtar) i cili dyshohet se ka qenë i përshirë vitin e kaluar për një vrasje në Shqipëri. Me urdhër të prokurorit, i dyshuari Gj.K., është ndaluar për 48 orë, ndërsa brenda afatit ligjor ndaj tij do parashtrohet edhe kërkesa për caktimin e paraburgimit. Për procedurat e mëtutjeshme rreth këtij rasti ju lutem i drejtoheni Ministrisë së Drejtësisë”, ka thënë Nikçi.
“Po ashtu është arrestuar edhe personi i cili e ka ndihmuar që të strehohet në një fshat të Pejës. I njëjti është ndaluar për 48 orë”, ka shtuar ai.
Si ndodhi ngjarja
Në orët e vona të mbrëmjes 30 tetorit 2022 kryeqyeti u trondit nga një atentat, ku mbeti viktimë Briken Sanaj, 39 vjeç, nga Lezha.
Konkretisht ngjarja e rëndë ka ndodhur në Kodrën e Diellit, Ai ka mbyllur makinën në garazhin e pallatit ku jeton dhe është takuar me tre të njohur në trotuar.
Gjatë kësaj kohe autorët janë afruar me makinë dhe në një distancë të afërt e kanë qëlluar me breshëri kallashnikovi. Të dhënat e mjetit i janë dhënë policisë, e cila ngriti postoblloqe në disa pika.
Briken Sanaj njihej nga rojet e rezidencës me identitetin Anton Gjini, por në dokumentet zyrtare emri i tij është Briken Sanaj.
Theksojmë se Sanaj ka tentuar ti shmanget plumbave por pa sukes. Pas të shtënave disa persona që ndodheshin në vendngjarje i kanë ardhur në ndihmë te plagosurit, duke e çuar në spital. Policia e Shtetit ka shoqëruar disa persona në komisiarat si të dyshuar për ngjarjen ndërsa në Qafë Kashar, në afërsi të një biznesi pllakash, është gjetur duke u djegur, një automjet.
