Vizita e programuar e kryeministrit Rama ditën e sotme në Elbasan ka bërë që të ketë përsëri rezistencë nga ana e simpatizantëve dhe mbështetësve të opozitës.
Protestuesit kanë bllokuar rreth-rrotullimin e Bradasheshit duke kërkuar që të bllokonin kalimin e kryeministrit në qytet, mirëpo kjo ka shkaktuar edhe tensionet mes tyre dhe policisë.
Pas disa minutash përplasje mes tyre, rruga është hapur dhe eskorta e kryeministrit ka kaluar pa asnjë problem.
Të njëjtën situatë kryeministri Rama e hasi ditën e djeshme në qytetin e Shkodrës, ku simpatizantët e PD-së bllokuan të gjitha rrugët që të fusin në qytet dhe e kanë mbajtur të bllokuar rrugën për më shumë se një orë.
Për këtë ngjarje ka reaguar edhe ministri i Brendshëm, Sandër Lleshaj, i cili tha se: “Në Kanun por edhe në ligj ekziston një paragraf që ka të bëj me udhën e madhe. Udha e madhe nuk pritet kurrë”.
Rama është duke organizuar turin e tij në të gjithë Shqipërinë nën moton “Bashkia që duam” dhe pikërisht për këtë arsye ndodhet ditën e sotme në qytetin e Elbasanit.
