Ditën e djeshme një ngjarje e rëndë ka ndodhur në një biznes agro-turizmi në Ersekë, ku një kalë është vrarë me armë gjahu. Ngjarja makabre është bërë e ditur nga vetë pronarët e agroturizmit, të cilët shprehen se janë shumë të pikëlluar nga mizoria dhe mungesa e dashurisë që njerëzit kanë ndaj kafshëve.
Ndërkohë që Policia e Kolonjës ka bërë të mundur zbardhjen e plotë të ngjarjes, ku bëhet me dije se është identifikuar autori i ngjarjes, O.M, 24 vjeç dhe ndaj tij kanë nisur një procedim penal në gjendje të lirë.
Njoftimi i policisë:
Kolonjë/Sqarim
Në lidhje me një rast të publikuar në rrjete sociale, në të cilin shfaqet një kafshë pune (kalë) e vrarë me armë gjahu, ju informojmë se:
Specialistët për Hetimin e Krimeve të Komisariatit të Policisë Kolonjë, si rezultat i veprimeve hetimore të kryera për zbardhjen dhe dokumentimin e kësaj ngjarjeje, referuan materialet në Prokurori dhe filloi procedimi në gjendje të lirë për shtetasin O. M., 24 vjeç, banues në fshatin Shelegur, Kolonjë, për veprën penale “Keqtrajtimi i kafshës”.
Nga hetimet rezultoi se ky shtetas, më datë 26.01.2023, gjatë natës, në fshatin Shelegur, ka vrarë me armë gjahu 1 kafshë pune (kalë) dhe ka plagosur 1 tjetër kafshë, te dyja në pronësi të shtetasit J. H. Materialet procedurale i kaluan Prokurorisë pranë Gjykatës së Shkallës së Parë Korçë, për veprime të mëtejshme.
Drejtoria Vendore e Policisë Korçë fton të gjithë qytetarët që të denoncojnë çdo rast të paligjshmërive, duke u siguruar reagim të shpejtë dhe të paanshëm, kundrejt shkelësve të ligjit.
