Moti i keq ka shkaktuar problematika në të gjithë vendin. Ministri i Mbrojtjes, Niko Peleshi këtë të enjte në një dalje për mediat bëri një bilanc të situatës në terren. Peleshi deklaroi se deri tani situata është nën kontroll dhe se strukturat janë në terren në gatishmëri për çfarëdolloj situate.
Ministri theksoi se një problem mjaft i madh është fryrja e lumenjve për shkak të prurjeve nga shirat, duke përmendur se lumi Vjosa është pranë niveleve kritike të tij. Kujtojmë se për shkak të prurjeve rritet nuveli në kaskadat e hidrocentraleve dhe për pasojë shkarkohen sasi të mëdha uji që shkaktojnë përmbytje.
“Priten reshje të dendura shiu në vend. Lumi Vjosa është pranë niveleve kritike. Ka shtim të përmbytjeve në zonat e Nënshkodrës. Shkarkimet po bëhen në mënyrë të kujdesshme nga KESH. Gjatë ditës së djeshme përmendën dhe shkëputjet e energjisë elektrike. Ka pasur disa ndërprerje në zona të Shkodrës, Kukësit, apo dhe në Korçë. Sa i përket kuotave të lumenjve, Osumi është në rënie. Në Urën e Varur, ky lum është në kuota normale. Drini në Shkodër, është në kuotë normale. Niveli i liqenit të Shkodrës është dhe gjysmë metri nga kuota kritike. Buna ka dalë nga shtrati. Në Lezhë kemi pasur disa vërshime në disa rrugë të qytetit.”, tha Peleshi.
