Zhdukja e Ervis Martinajt është një çështje e “nxehtë”, ku së fundmi eksperti i sigurisë Fatjon Softa shprehet se fakti që nuk ka akoma një kufomë do të thotë që ai jeton.
Gjithashtu Softa shton se nëse Martinaj është gjallë, ai është mes dhe përreth nesh dhe sigurisht që do të gjendet.
Ndër të tjera për “Panorama TV”, Softa u shpreh që Policia e Shtetit nuk duhet të bëjë kërkime spontane nëpër banesa pa pasur një indicie që mund të çojë në prova të reja mbi këtë çështje por jo vetëm.
“Kjo është çështje që për aq kohë s’ka një kufomë unë e them që ai është gjallë. Aq kohë sa është ky version duhet të nisemi e nga shumë raste si ai në Itali që pas 30 vitesh në kërkim u arrestua nga policia italiane një person shumë i rrezikshëm e i kërkuar. Nëse është gjallë patjetër një ditë do gjendet e ndalohet, por ai mund të jetë e mes nesh përreth nesh, e si ka ndodhur prej vitesh tek ne që kur s’duam ta gjejmë nuk e kërkojmë se nuk duam probleme”, tha ai.
Duke u ndalur te kontrollet e policisë në banesën e tij dhe të xhaxhallarëve, eksperti i sigurisë tha:“Sa kohë shkon për kontrolle qoftë në Vlorë e banesën e tij, presupozon që është gjallë personi. Kjo ka qenë dhe për të plotësuar atë dosje hetimore që kishte mangësi se nuk ishte bërë një kontroll në banesë dhe u bë dhe rezultuan disa gjëra që po të kishin qenë më herët do kishin gjetur më shumë. U gjetën uniforma policie maska fytyre armatime, mund të jenë gjurmë të ndryshme që mund të zbulojnë ngjarje të ndryshme. Nëse gjurmët te maska, te fijet e flokut, apo lekët, nëse përputhen me vrasje kriminale gjendet nëse mund të kenë ardhur nga ky grup apo të hedhë dritë mbi ca ngjarje kriminale të ndodhura më parë. Kërkimi është një sfidë për policinë e shtetit por kjo sfidë s’mund të vijë me kontrolle banesash spontante por me një informacion”, shprehet eksperti i sigurisë Fatjon Softa.
