Një sasi e madhe nafte kontrabandë është kapur dhe sekuestruar nga policia në portin e Durrësit. Sipas burimeve mësohet se bëhet fjalë për një sasi prej 51 mijë litra naftë të padeklaruara, të cilat ndodheshin në hambarin e një anije të quajtur “Geni”. Kjo anije peshkimi është e katërta që zbulohet me naftë kontrabandë në hambarin e saj brenda 6 muajve të fundit.
Anijet e peshkimit, prej vitesh janë kthyer në protagoniste të kontrabandës së naftës në vend. Ato e marrin me çmim shumë të ulët në vendet e Lindjes së Mesme, kryesisht nga Libia me pretendimin se po furnizohen për nevojat e veta dhe pastaj e shesin në treg me çmim shumë herë më të lartë në Shqipëri. Kjo ka ndodhur edhe me këtë sasi të kapur sot e cila dyshohet se është marrë në det të hapur nga mjete të tjera lundruese, me çmim më të ulët.
Ndërkohë që ka nisur procedimi për kapitenin e saj dhe personat që ndodheshin në ekuipazh.
Kujtojmë se çmimi i naftës është rritur tej mase, si rrjedhojë e konfliktit që vazhdon akoma midis Rusisë dhe Ukrainës. Rusia është një ndër vendet më të pasura me naftë dhe furnizonte një pjesë të mirë të tregut Europian, por pas sanksioneve që iu vendosën Rusisë, për shkak të nxitjes së luftës u ul sasia e furnizimeve dhe solli rritje të çmimeve kudo në botë.
