Protesta e sotme e opozitës nuk ka kaluar pa u përmendur edhe në Parlament, ku ka qenë Kreu i Grupit Parlamentar të PS-së, Taulant Balla i cili i ka drejtuar një paralajmërim Lulzim Bashës.
Balla nga foltorja i është drejtuar kryedemokratit Basha duke i thënë se në rast se protestën e sotme nxit dhunë, kryen akte vandalizmi ose sulmon policinë, do të përballet vet me ligjin dhe s’e shpëton njeri.
Sipas kreut të Grupit Parlamentar, Basha dhe Kryemadhi mund të bllokojnë të gjitha akset që duan, por nuk do bllokojnë dot Reformën në Drejtësi.
“Nuk mund të bllokojnë miratimin e këtij ligji, sikur nuk kanë mundur që prej 2016 të bllokojnë paketën. Ata munguan në pjesën më të madhe të këtij procesi”, ka thëën Balla.
Mirëpo ndër të tjera ai ka treguar edhe për bisedën që ka pasur me një biznesmen gjerman, i cili i kishte thënë se kishte ardhur me një avion të mbushur plotë me turistë gjermanë.
“Në vazhdën e këtyre protestave të dhunshme që dëmtojnë ekonominë… Ishim para pak minutash në Rinas ku u hodh themeli për një nga hotelet më 5 yje më të mira në Shqipëri. Përfaqësuesi i kësaj kompanie gjermane tha se erdha nga Mynihu me një avion të madh të mbushur plot me turistë gjermanë. Dhe ndërsa shkojnë në Vlorë, do iu dalë para Luli dhe Mona. Do pyesin ça halli kanë, halli i tyre është reforma në drejtësi. Nuk kanë për t’ia arritur të bllokojnë demokracinë dhe as zgjedhjet. Halli i tyre është halli i biznesit të kunatit jo i një qytetari të ndershëm.
Dëgjoje Lulzim: Ke të gjithë të drejtën të protestosh ku të duash sa të duash po harroje se mund të nxisësh dhunë, të kryesh akte vandalizmi, të sulmosh policinë se ke për t’u përballur me ligjin qoftë ti apo kushdo tjetër”, deklaroi Balla.
