Është zbardhur ngjarja e ndodhur mesnatën e së hënës në Përrenjas, ku në lokalin e shtetasit Dhimitër (Agim) Kokonozi pati një shpërthim. Si pasojë e hetimeve janë identifikuar dhe prangosur 2 shtetas, si autorë të dyshuar të kësaj ngjarjeje. Mësohet se njëri prej tyre ka precedent të theksuar kriminal këtu dhe në Itali për vepra penale në fushën e krimeve ndaj personit dhe pronës.
Specialistët për Hetimin e Krimeve të Komisariatit të Policisë Librazhd, nën drejtimin e Prokurorisë pranë Gjykatës së Rrethit Gjyqësor Elbasan, falë veprimeve të shpejta hetimore dhe profesionale, në vendngjarje, me qëllim grumbullimin e çdo prove për zbardhjen dhe dokumentimin e kësaj ngjarjeje, identifikuan, shoqëruan dhe ndaluan shtetasit:
-Rei Karriqi, 23 vjeç dhe Arjan Pino, 41 vjeç, të dy banues në lagjen Nr. 2, Përrenjas, Librazhd. Nga veprimet hetimore të deritanishme rezulton se këta 2 shtetas, në bashkëpunim me njëri-tjetrin, janë autorët e dyshuar të hedhjes së një granate dore, në verandën e lokalit të shtetasit Dhimitër (Agim) Kokonozi.
Në cilësinë e provës materiale, u sekuestruan 2 aparate celulare.
Vijon puna, nën drejtimin e Prokurorisë, për dokumentimin e plotë të motivit dhe të rrethanave të kësaj ngjarjeje.
Materialet procedurale i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme hetimore.
