Mbrëmjen e sotme aksi rrugor Lezhë-Laç është përgjakur për shkak të një aksidenti të rëndë. Bëhet me dije se dy automjete janë përplasur e për pasojë janë plagosur 4 të rinj, 2 prej të cilëve në gjendje të rëndë.
Të plagosur kanë mbetur Marinela Gjergji 28-vjeç, Daniel Gjergji 24-vjeç, Fatjon Gjura 30-vjeç dhe Marjan Marku.
Katër të rinjtë janë dërguar në spitalin e Lezhës, ndërkohë që njëri prej tyre ka qenë në gjendje më të rëndë dhe është dërguar me urgjencë në Tiranë. Ndërkohë policia ndodhet në vendngjarje për të hetuar shkaqet e aksidentit.
“Lezhë / Informacion paraprak
Rreth orës 20:00, në aksin rrugor Lezhë – Milot, në vendin e quajtur ” Kryqëzimi i Rriles”, janë aksidentuar dy automjete tip ” Ford” me drejtues shtetasit D. Gj. dhe M. M. Për pasojë janë lënduar të dy drejtuesit e mjeteve si dhe pasagjerët shtetasi F. Gj. dhe shtetasja M. Gj. të cilët ndodhen në spital nën kujdesin mjekësor.
Grupi hetimor në vendin e ngjarjes vazhdon veprimet hetimore për zbardhjen e plotë të rrethanave të aksidentit”, thuhet në njoftimin e Policisë së Shtetit.
Sjellim në vëmendje se ky vit ka shënuar më pak aksidente rrugore, ndërsa dhe numri i atyre që kanë humbur jetën është më i ulët. Sipas INSTAT, në muajin Tetor 2022 numërohen 84 aksidente rrugore nga 127 të ndodhura në muajin Tetor 2021. Numri i aksidenteve rrugore është ulur me 33,9%. Numri i të aksidentuarve (të vrarë dhe të plagosur) rezulton 105 persona nga 179 në muajin Tetor 2021.
